Joh 6 | NdeIBE | STEP | Ngesinye isikhathi ngemuva kwalokhu uJesu wachaphela ngaphetsheya koLwandle lwaseGalile (kutshiwo uLwandle lwaseThibheriya),

John 6

UJesu Usuthisa Abayizinkulungwane Ezinhlanu

1 Ngesinye isikhathi ngemuva kwalokhu uJesu wachaphela ngaphetsheya koLwandle lwaseGalile (kutshiwo uLwandle lwaseThibheriya),

2 njalo walandelwa lixuku elikhulu labantu ngokuba babona imimangaliso ayeyenzile kwababegula. 3 UJesu wasesiya eceleni lentaba wahlala khona labafundi bakhe. 4 IDili lePhasika labaJuda lase lisondele.

5 UJesu wathi uyakhangela wabona ixuku labantu elikhulu lisiza kuye, wathi kuFiliphu, “Sizasithenga ngaphi isinkwa ukuze abantu laba badle?” 6 Wabuza lokhu emlinga nje kuphela ngokuba wayevele esekwazi ayezakwenza.

7 UFiliphu wamphendula wathi, “Amadenariyo angamakhulu amabili ngeke athenge isinkwa esaneleyo ukuthi lowo lalowo azuze ucezwana!”

8 Omunye wabafundi bakhe, u-Andreya, umfowabo kaSimoni Phethro, wakhuluma wathi,

9 “Nangu umfana olezinkwa zebhali ezinhlanu lezinhlanzi ezimbili ezincinyane, kodwa zingafika ngaphi ebantwini abanengi kangaka na?”

10 UJesu wathi, “Hlalisani abantu phansi.” Kwakulotshani obunengi kuleyondawo, asehlala phansi amadoda ubunengi bawo bungaba yizinkulungwane ezinhlanu. 11 UJesu wasezithatha izinkwa, wakhuleka, wasezabela labo abasebehlezi phansi, wabapha njengokufuna kwabo. Wenza njalo langezinhlanzi.

12 Kwathi bonke sebanelisiwe yikudla, wasesithi kubafundi bakhe, “Buthani imvuthu eseleyo. Kakungalahlwa lutho.” 13 Ngakho bazibutha bagcwalisa izitsha ezilitshumi lambili ngemvuthu zezinkwa zebhali ezatshiywa yilabo ababedlile.

14 Abantu sebewubonile ummangaliso awenzayo uJesu baqalisa ukuthi, “Ngeqiniso lo nguye uMphrofethi ozafika emhlabeni.” 15 UJesu esazi ukuthi babeqonde ukuza bazomenza inkosi ngenkani, wathi nyelele wabuyela entabeni yedwa.

UJesu Uhamba Phezu Kwamanzi

16 Kwathi sekusihlwa abafundi behlela echibini, 17 lapho abakhwela khona isikepe bachapha ichibi baya eKhephanawume. Ngalesosikhathi kwase kuhlwile, uJesu elokhu engakabuyi kubo. 18 Kwakuvunguza umoya omkhulu amanzi asequbuka kubi. 19 Sebegwedle okwamakhilomitha amahlanu loba ayisithupa bambona uJesu esiza esikepeni ehamba phezu kwamanzi; bethuka kakhulu. 20 Kodwa wathi kubo, “Yimi; lingesabi.” 21 Babefuna ukumngenisa esikepeni, kwathi masinyane isikepe sahle safika ekhunjini lapho ababeqonde khona.

22 Ngelanga elilandelayo ixuku labantu elalisele ekhunjini elinganeno lananzelela ukuthi kwakukade kulesikepe esisodwa, lokuthi uJesu wayengakhwelanga kuso kanye labafundi bakhe, kodwa babehambe bodwa. 23 Kwasekufika ezinye izikepe zivela EThibheriya zamisa eduze lalapho abantu ababedlele khona isinkwa ngemuva kokuba iNkosi isiqale yakhuleka. 24 Ixuku lonela ukunanzelela ukuthi uJesu kanye labafundi bakhe babengasekho lapho bakhwela ezikepeni baya eKhaphenawume ukuyadinga uJesu.

UJesu Yisinkwa Sokuphila

25 Bathi sebemfumene ngaphetsheya kwechibi bambuza bathi, “Rabi, kanti ufike nini lapha na?”

26 UJesu waphendula wathi, “Ngiqinisile ukuthi kalingidingi ngoba libonile imimangaliso kodwa ngoba lidle izinkwa lasutha. 27 Lingasebenzeli ukudla khona okubolayo, kodwa sebenzelani ukudla okuhlalayo, okwempilo engapheliyo, elizakuphiwa yiNdodana yoMuntu. UBaba usebeke kuyo uphawu lwakhe lokuyibeka.”

28 Basebembuza bathi, “Simele senzeni ukuze senze umsebenzi kaNkulunkulu na?”

29 UJesu waphendula wathi, “Umsebenzi kaNkulunkulu yilo: ukukholwa kulowo amthumileyo.”

30 Basebembuza bathi, “Uzasitshengisa mmangaliso bani esizawubona ukuze sikukholwe na? Kuyini ozakwenza? 31 Okhokho badla imana enkangala; njengoba kulotshiwe ukuthi: ‘Wabapha isinkwa sivela ezulwini ukuba badle.’ ”

32 UJesu wathi kubo, “Ngiqinisile ngithi, kakusuye uMosi olinike isinkwa sivela ezulwini, kodwa nguBaba olinika isinkwa seqiniso sivela ezulwini. 33 Ngokuba isinkwa sikaNkulunkulu singulowo owehla ezulwini anike ukuphila emhlabeni.”

34 Bathi, “Mnumzana, kusukela manje siphe lesisinkwa sokuphila.”

35 UJesu wachaza wathi, “Ngiyisinkwa sokuphila. Lowo ozayo kimi kasoze afa alamba, lalowo okholwa kimi kasoze aphinde ome. 36 Kodwa njengoba ngilitshelile selingibonile kodwa lilokhu lingakholwa. 37 Konke lokho uBaba anginika khona kuzakuza kimi, njalo lowo ozayo kimi kangisoze ngimlahle. 38 Ngokuba ngehlile ezulwini, hatshi ukuzakwenza eyami intando kodwa ukwenza intando yalowo ongithumileyo.

39 Intando yakhe ongithumileyo yile, ukuthi ngingalahlekelwa langokukodwa kwalokho anginike khona, kodwa ngibavuse ngosuku lokucina. 40 Ngokuba intando kaBaba iyikuthi bonke abakhangela eNdodaneni bakholwe kuyo bazakuba lokuphila okungapheliyo, njalo ngizabavusa ngosuku lokucina.”

41 Besizwa lokhu abaJuda baqalisa ukukhonona ngaye ngoba wathi, “Ngiyisinkwa esehlayo sivela ezulwini.” 42 Bathi, “Kanti kasuJesu lo indodana kaJosefa na? Oyise lonina kasibazi na? Pho angakutsho kanjani manje ukuthi, ‘Ngehla ngivela ezulwini’?”

43 UJesu wathi, “Yekelani ukukhonona phakathi kwenu. 44 Kakho ongeza kimi ngaphandle kokuthi uBaba ongithumileyo amsondeze, mina-ke ngizamvusa ngosuku lokucina. 45 Kulotshiwe kubaPhrofethi ukuthi: ‘Bonke bazafundiswa nguNkulunkulu.’ Wonke lowo olalela uBaba afunde kuye uyeza kimi.

46 Kakho osewake wambona uBaba ngaphandle kwalowo ovela kuNkulunkulu; nguye kuphela ombonileyo uBaba. 47 Ngiqinisile ukuthi lowo okholwayo ulokuphila okungapheliyo.

48 Ngiyisinkwa sokuphila. 49 Okhokho benu bayidla imana enkangala, kodwa bafa. 50 Kodwa nansi isinkwa esehlayo sivela ezulwini, umuntu angasidla angabe esafa. 51 Ngiyisinkwa esiphilayo esehlela phansi sivela ezulwini. Nxa umuntu angasidla lesisinkwa, uzaphila laphakade. Lesosinkwa siyinyama yami engizayinikela ukuphila komhlaba.”

52 Lapho-ke abaJuda base beqalisa ukuphikisana ngamandla besithi, “Umuntu lo angasipha kanjani inyama yakhe ukuba siyidle na?”

53 UJesu wathi kubo, “Ngiqinisile ngithi, ngaphandle kokuba lidle inyama yeNdodana yoMuntu, linathe igazi layo, kalilakuphila phakathi kwenu. 54 Lowo odla inyama yami njalo anathe igazi lami ulokuphila okungapheliyo, njalo ngizamvusa ngosuku lokucina. 55 Ngokuba inyama iyikhona kudla okuqotho legazi lami liyikunatha okuqotho. 56 Lowo odla inyama yami njalo anathe igazi lami uhlala kimi, lami kuye. 57 Njengoba uBaba ophilayo wangithuma njalo ngiphila ngenxa kaBaba, kanjalo lowo odla mina uzaphila ngenxa yami. 58 Lesi yiso isinkwa esehlayo sivela ezulwini. Okhokho benu badla imana kodwa bafa, kodwa odla lesisinkwa uzaphila lanininini.”

59 Wakutsho lokhu efundisa esinagogeni eKhaphenawume.

Abafundi Abanengi Bahlamuka UJesu

60 Bathi bekuzwa lokhu abafundi bakhe abanengi bathi, “Le yimfundiso enzima. Kambe ngubani ongayamukela na?”

61 UJesu wathi ngokunanzelela ukuthi abafundi bakhe babekhonona ngalokhu wathi kubo, “Lokhu kuyalikhuba yini? 62 Kungaba njani pho uma lingayibona iNdodana yoMuntu ikhwela ibuyela lapho eyayikhona ngaphambili! 63 UMoya unika ukuphila; inyama kayisilutho. Amazwi engiwakhulume kini angumoya njalo ayikuphila.

64 Kodwa bakhona abanye benu abangakholwayo.” Ngoba uJesu wayevele esazi kwasekuqaleni ukuba yibaphi kubo ababengakholwa lokuthi ngubani owayezamnikela. 65 Waqhubeka wathi, “Yikho ngalitshela ngathi kakho ongeza kimi ngaphandle kokuba ephiwe amandla nguBaba.”

66 Kusukela kulesosikhathi abafundi bakhe abanengi bamdela ababe besamlandela.

67 “Lina kalifuni ukutshiya na?” uJesu ebuza abaliTshaumi lambili.

68 USimoni Phethro wamphendula wathi, “Nkosi, sizakuya kubani na? Wena ulamazwi okuphila okungapheliyo. 69 Thina siyakholwa njalo siyazi ukuthi ungoNgcwele kaNkulunkulu.”

70 UJesu wasephendula wathi, “Kangilikhethanga yini, lina eliliTshumi lambili na? Ikanti omunye wenu unguSathane!” 71 (Wayesitsho uJudasi, indodana kaSimoni Isikariyothi, owathi loba engomunye wabaliTshumi lambili, kamuva wamnikela.)